ÈS LAKOU KA DÒMI ?
An ké di zòt sa... on ti jan « ispésyal oben èspésyal ». Mé mafwa, sé zòt tousèl ké pé pòté jijman.
Mayénèl, sé on bèl jennfi an vérité. Pou manman-y Awmèl, sé menm pli bèl jennfi komin a-y é menm pli lwen. Sèten ! Monchè, Awmèl fè Mayénèl si lè ta. I té ja tini on ti laj, kwa !
É jou-la Mayénèl fèt la, on jouswa an mitan plennlin, Awmèl té kontan, kontan, kontan, kon sourit adan sak farin. Tout figi a li té ka ri.
Plita, an ké palé zòt dè Mayénèl. Pou alè, an k’ay palé zòt dè gran-anman a li, man Albè*, é dè ti- anman a li, Awmèl.
Kouté byen en ! Nou k’ay vwè kijan gran-anman Mayénèl lévé fi a-y, Awmèl.
Lakou pa ka dòmi é lakou pa dwèt dòmi nonplis ! Awa lasistans ! fò pa zòt dòmi ditou davwa, Mayénèl, li, i pa ka dòmi.
ALÒ, ÈS LAKOU KA VÉYÉ ?
Kimoun ki Mayénèl ?... Pa tòtòy* lèspri a zòt ! " Pa fann !" kon jennmoun ka di. Épi onlo plézi, an k’ay rakonté zòt listwa a Mayénèl é manman-y Awmèl, dépi yo té toupiti, jistan yo vini gran.